2ê Temmuza 1993î de bajarê Sêwasî de Otelê Madimakî de 33 kesî ameybî veşnayîş û vizêr serrgêra 25. ya Qetlîyamê Madimakî bî. Doza Madimakî bi mehneya ‘wext sera derbaz bîya’ prosesê AKPyî de amey.
betalkerdişe. Avûkatê qatilan û kerdoxê qetlîamî îqtîdarîyê AKPyî de bîyî wezîr, parlementer û burokratê pîlî
2ê Temmuza 1993î de bajarê Sêwasî de Otelê Madimakî de 33 kesî ameybî veşnayîş û vizêr serrgêra 25. ya Qetlîyamê Madimakî bî. Otelê Madimakî de 33 kesî bi hawayo wehşane ameyî qetilkerdiş û hema zî hetê muhakemekerdişî de edalet nêameyo ca. 33 kesê ke seba vîrardişê Pîr Sultan Abdalî ameyî bajar, Otelê Madimakî de bi ganî ameyî veşênayîş. Vîrardiş hetê Komeleya Kulturî ya Pîr Sultan Abdalî (PSAKD) ra amebî organîzekerdiş û bi desan roşnvîr û hunermendî waştî ke tewrê organîzasyonî bibî. Roşnvîr û hunermendê ke ameyî qetilkerdiş bajarê Anqara ra kewtî rayirê Sêwasî.
Doza Madimakî bi mehneya ‘wext sera derbaz bîyo’ prosesê AKPyî de amey betalkerdiş. Avûkatê qatilan û kerdoxê qetlîamî îqtîdarîyê AKPyî de bîyî wezîr, parlementer û burokratê pîlî.
Qetlîamê Madimakî ra di rojî verê cu sêr nameyê ‘raya pêroyî ya mislimanan’ ra vilawekî ameyî vilakerdiş. Vilawekan de ameyêne îdîakerdiş ke siêf dîyayo pêxember û Quranî. Rojnameyê herêmî zî sey nê vilawekan roşnvîr û hunermendan kerdî hedefê hêrişan.
Bi siloganan merdiman veşênayî
Roja Îne, koma ke camî û dorme ra vejîyayî arê bîyî û siloganê ‘Sêwas do bibo mezelê laîkî, Komar Sêwasî de awan bî do Sêwasî de birijîyo, Sêwas do Azîzî rê bibo mezel’ eştî. Kome bi siloganê nijadperestan hetê Merkezê Kulturî ke do vîrardiş tede biameyêne kerdişî ra meşîyayî û hêriş pê ardî. Badê ke hedîse dest pêkerd, hûmara hêrişkaran zêde bîye. Hûmara hêrişkaran resabî bi des hezaran kesan. Hêrişkar û nijadperestî adir vera dayî wesayîtê ke otelî ver de bî û xortimê arkujan zî birnayî.
Bin kontrolê dewlete de hêriş kerdî
Seba ke adir gur bibo, camê otelî ameyî şiknayîş û çaputê menzînkerdeyan eştî zerre. Komêk leşkerî ameyî otel vera û badê ke hêrişkaran reyde qisey kerdî, şîyî. Kesê ke mîyanê otelî de asê mendî, rayedarê dewlete gêrayî û waştî ke hereket bikerî. Hêrişkarî bin kontrolê dewlete de hêriş pê ardî û hêriş 12 saetan dewam kerd. Netîceyê hêrişan de 33 kesî ke seba vîrardişî ameyî Sêwasî cuya xo vînî kerdî. 41 kesî zî bi îmkananê xo otelî ra xo xelisnayî.
Temsîlkarê qetlîamanê lêşinan
Prosesê qetlîamî de temsîlkarê qetlîamanê lêşinan yê Kurdistanî Tansu Çîller Serewezîr û Suleyman Demîrelî zî Serekkomar bî. Tansu Çîllere qetlîamî ra dima vatbî ‘Şukir Homa rê çîyêk bi şarê ma yê teberê otelî nêame.’ Suleyman Demîrelî zî wina vatbî ‘Ma do destûr nêdî şar û hêzê ma yê pawitişî bêrî vera yewbînan. Hedîseyêk munferît o. Bi şîddet ameyo surekerdiş. Cok ra şar werişto payan ser. hêzê pawitişî çi destê înan ra ameyo kerdî.’ Wezîrê Karê Zerre Mehmet Gazîogluyî zî Azîz Nesînî sucdar kerdbî û wina vatbî ‘Texrîqê Azîz Nesînî yê vera bawerîya şar, merdimanê bawermendan sure kerdo.’
Qatilî mîyanê AKPyî de yî
Serekwezîrê nika Tayyîp Erdoganî bersê derheqê betalkerdişê doza qetlîamê Otelê Madimakî yê Sêwasî de vatbî ‘Seba milletê ma, seba welatê ma xêr ser bo.’ Avûkatê qatilan û kerdoxê qetlîamî îqtîdarîyê AKPyî de bîyî wezîr, parlementer û burokratê pîlî. Hayatî Yazici avûkatê qatilan bî û awankerdişê AKPyî de ca girewt. Yazici weçînayîşê 3 Teşrîna Peyêne 2002î de bajarê Stenbolî ra bî parlementer, Wezîrê Dewlet û Hetkarê Serekwezîrî. Avûkatê qatilan Kemal Kurt, Mehmet Bulut, Bulent Tufekçî, Zeyîd Aslan, Alî Aşlik, Halîl Urun û Husnu Turan bîyî parlamenterê AKPyî.
Ganî hesab bêro perskerdiş
Komel û rêxistinê elewî badê qetlîamî waştî ke Otelê Madimakî bibo ‘Muzeya Şermî’ û muhakemekerdişêk adil de hesabê qetlîamî bêro perskerdiş. Labelê 25 serrî yo ke waştişê komelê elewîyan nîno ca. Otelê Madimakî nika sey ‘Merkezê Zanayîş û Kulturî’ yeno xebitnayîş.
